||| ඉර නැගුම |||

ඉර නැගෙනු බලන්නට - සිත සිතා සිටි මෙමට
ඉඟි කලෙන් කලින් දා  - නින්ද විත් නෙතු අගට
නැගෙන්නට මත්තෙන්ම  - සඳ තරුද රෑ නුබට
පාවුනා වළාකුල්  - ගැවසිගත් හීනයක 

වළාකුළු මත ඉඳන් - අත වනා සමුගන්න
හැමෝටම ආදරෙන්  - හාදු වැහි වස්සන්න
පුංචි තරු දිලි දිලී  - දිලිසුනා ලස්සනට
නිවි නිවී සැලි සැලී  - පහන් සිළු වගේ සොඳ

අමතකයි දකින්නට  - ආව වග ඉර එළිය
නැවතිලා අතරමග  - විඳින්නට සඳ එළිය
කිමිදිලා ගැඹුරටම  - සඳ දියේ තරු ගිලුන 
සොයනවා මම තවම  - තනි තරුව ගිලිහිච්ච

පිබිදිලා හීනයෙන්  - වෙලාවක ගිනිගත්ත
හොයනවා ඉර එලිය  - දැකගන්න බැරුව ගිය
ගිනියමින් පිච්චිලා - අළුවෙලා වැටෙනකොට
හැඟෙනවා නුඹම බව  - මගහැරුණු ඉර එළිය

~අමා~